Toure: Dëshiroj që Eto'o të qëndrojë te Barca
Yaya Toure ka deklaruar se ai dëshiron që Samuel Eto'o të qëndrojë te skuadra aktuale dhe njëkohësisht ka shprehur dëshirën që Lionel Messi të mund të luajë në fazën kualifikuese të Ligës së Kampionëve.
“Ai ka një karakter të fortë dhe ne dëshirojmë që ai të qëndroje me neve. Samu po kalon një periudhë të vështirë, mirëpo ai është një person shumë pozitiv dhe po sillet në mënyrë shumë profesionale”, ka thënë mesfushori i Barcës për Eto’o.

Ndërsa duke iu referuar situatës së krijuar në lidhje me Messin dhe Lojërat Olimpike, Toure ka thënë: “Është një situatë e ndërlikuar pasiqë për të ka nevojë edhe Barca edhe Argjentina. Të jem egoist, më shumë do të më pëlqentë që të jetë me ne në fazën kualifikuese të Ligës së Kampionëve”.

Totti: Dua ta mbyll karrierën te Steaua Bucharest
Kapiteni i Romës, Francesco Totti, ka njoftuar se ai dëshiron ta mbyllë karrierën futbollistike në moshë 45-vjeçare te skuadra rumune, Steaua Bucharest.
Simboli i Romës, e ka bërë debutimin për Giallorosët si 16-vjeçar në vitin 1993, ndërsa tani pas më shumë se 15 vitesh, skuadra e Romës nuk mund të paramendohet pa Er Pupone.

31-vjeçari i mban rekordet e paraqitjeve dhe është golashënuesi më i mirë i të gjitha kohërave te kryeqytetasit, si edhe njeriu kryesor për Scudetton e vitit 2001.

Mirëpo, gjatë takimit ndërmjet Romës dhe Steaua Bucahrestit (të cilën Roma e humbi me rezultat 3-1), në të cilin Totti ishte i ftuar si mysafir, pasi që nuk mund të luante për shkak të lëndimit, tifozët nga Bukureshti i bënë një mikpritje të paharruar sulmuesit, saqë ai ka bërë shaka se dëshiron ta përfundojë karrierën te skuadra e tyre.

“Për këtë nderim që ma keni bërë, kur t’i mbush 45 vjet dhe të jem i gatshëm për ta mbyllur karrierën, do të vij këtu”, i ka thënë Totti presidentit të Steauas, George Becali.

Calderon: Ose Ronaldon ose askënd tjetër
Ramon Calderon ka vendosur që ta nevrikos trajnerin e Real Madridit, Bernd Schuster, duke iu thënë drejtuesve të klubit se nëse Cristiano Ronaldo nuk u bashkëngjitet Mbretërve, atëherë nuk do të transferojnë asnjë lojtar tjetër.
“Ose vjen Cristiano Ronaldo ose nuk vjen askush tjetër”, është cituar të ketë thënë Calderon.

Rafael Van der Vaart dhe David Villa janë dy lojtarët të cilët i dëshiron trajneri madrilen, mirëpo fjalët e Calderonit janë një goditje e madhe për Schuster, i cili ka deklaruar se Reali ka nevojë për dy ose tre lojtarë të rinj për ta freskuar skuadrën, pavarësisht se ata janë kampionë të La Ligas.

Në fazën elektorale, Calderon kishte premtuar se do ta sillte asin e Milanit, Kaka, në Madrid si edhe spanjollin, Cesc Fabregas, mirëpo dështoi të transferonte këta dy. Ndërsa, siç duket tani ai është më i vendsour se kurrë për të sjellë në skuadër një emër të madh.

I pashmangshëm kalimi i Shevchenkos te Milan
Sipas "Il Corriere Dello Sport", sulmuesi i Chelseat, Andrei Shevchenko ditët që pasojnë do t’i bashkëngjitet ish-skudrës së tij, Milan.
Mediat britanike kanë shkruar se ukrainasi nuk bën pjesë në planet e Bluve dhe pritet një largim i tij nga Chelsea. Ndërsa pas lëndimeve të mëdha të Milanit në sulm, kuqezinjtë janë gjetur në një krizë dhe kanë nevojë të domosdoshme për një sulmues.

Shevchenko gjithmonë e ka shprehur dëshirën e tij për t’iu bashkangjitur ish-skuadrës me të cilën e arriti kulminacionin e karrierës së tij, ndërsa sipas “Il Corriere Dello Sport”, kjo dëshirë do të realizohet shumë shpejt.

“Nëse Sheva largohet nga Chelsea, nuk do të lejojmë që ai të luajë për ndonjë skuadër tjetër përveç Milanit”, ka thënë trajneri i kuqezinjve, Carlo Ancelotti.

Pandev arrin marrëveshje të re me Lazion
Sulmuesi Goran Pandev, iu ka dhënë fund spekulimeve se ai dëshiron të largohet nga Lazio, pasi që presidenti i këtij klubi, Claudio Lotito, ka zbuluar se ai ka arritur marrëveshje për kontratë të re me maqedonasin.
“Ne kemi arritur marrëveshje me Goran për vazhdimin e kontratës. Ai do të mbetet në klub për një kohë më të gjatë. Ai e din se ka dashuri dhe përkrahje në këtë klub”, ka thënë Lotito.

“E bëra zgjidhjen time, kemi sjellë lojtarë të rinj këtu dhe duhet të dëshmohemi edhe më shumë. Lazio duhet të qëndrojë në krye, Palermo dhe Fiorentina, sipas mendimit tim, nuk janë më të mira se ne”, ka thënë Pandev.

Pandev kaloi në Lazio nga Ancona në vitin 2004, dhe ka në kontratën aktuale vetëm edhe dy vite të mbetura, ndërsa ka pasur spekulime të vazhduara se ai do të largohet nga klubi romak, për një klub më të madh.

Së fundi maqedonasi është lidhur me një varg klubesh evropiane, përfshirë edhe kampionin e

Pepe: Lojtarët janë të pakënaqur me rastin Ronaldo
Mbrojtësi portugez Pepe, thotë se lojtarët e Real Madridit janë ngopur me spekulimet e vazhdueshme të transferimit të anësorit të Manchester United, Cristiano Ronaldos.
“Duhet të pranojmë se Real Madridi ka ekipin e tij dhe se lojtarët i kanë kualitetet e tyre”, ka thënë Pepe.

“Ka një mosrespektim për shkak se ekipi nuk mund të mbështetet në një lojtar, edhe nëse ai është shumë i mirë. Pele dhe Maradona kanë fituar ndeshje të mëdha, por ata janë ndihmuar nga bashkëlojtarët e tyre”, ka shtuar portugezi.

Ancelotti: Milani është favorit për skudeton
Trajneri i rosonerëve, Carlo Ancelotti, beson se ka përbërje mjaft kualitative për të luftuar për titullin e Serie A, gjatë sezonit të ri.
Milani pati dy sezone mjaft dëshpëruese në Serie A, ndërsa vitin e fundit e humbi vendin që kualifikon në Ligën e Kampionëve, duke u renditur vetëm në pozitën e pestë.

“Milani është favorit për të fituar skudeton. Nëse nuk kemi probleme me lëndimet, besoj se e kemi ekipin më të mirë në Serie A”, ka thënë Ancelotti për Corriere dello Sport.

Milani sonte do të ketë testin e parë më serioz, kur do të ndeshet me Juventusin dhe rivalin e qytetit, Interin, në garën për Trofeun Tim.

Benitez nuk pushon në tregun e transferove
Trajneri i Liverpoolit, Rafael Benitez, nuk do të ndalojë, pas transferimit të Robbie Keane, dhe do të kthejë menjëherë vëmendjen e tij në sigurimin e shërbimeve të Gareth Barryt.
Menaxheri i Liverpoolit, mbrëmë kompletoi nënshkrimin me sulmuesin e Tottenhamit, me të cilin të kuqtë do të nënshkruajnë kontratë 4-vjeçare të vlefshme 80 mijë funte në javë (100 mijë euro).

Por burime të afërta me klubin anglez e kanë bërë të qartë se Benitez është i vendosur të sjellë në Anfield edhe Barryn nga Aston Villa, pavarësisht se trajneri Martin O’Neill ka thënë se klubi i tij “e vlerëson Gareth më shumë se që këtë e bën Liverpooli”.