Ronaldinho zyrtarisht lojtar i Milanit
Ekipi i Milanit ka pohuar mbrëmë në ueb faqen zyrtare se superylli brazilian Ronaldinho, është përforcimi më i ri i rosonerëve.
“Ekipi i Milanit dhe ai Barcelonës kanë arritur marrëveshje për transferimin e Ronaldinhos. Lojtari nesër do të arrijë në Milan, ku do t’i kryejë kontrollet mjekësore, para se të nënshkruajë marrëveshje sipas së cilës, do të qëndrojë në San Siro deri më 30 qershor të vitit 2011”, thuhet në deklaratën e klubit kuqezi.

Lojtari do ta lëshojë Barcelonën sot në ora 11, dhe do të fluturojë në Itali së bashku me Adriano Gallianin. Detajet financiare nuk janë të publikuara, por spekulohet se rosonerët, për shërbimet e Ronaldinhos do të paguajnë 18 milionë euro.

Oferta e Milanit ishte më e ulët se ajo e rivalit tjetër për të marrë shërbimet e brazilianit, Manchester Cityt, por dëshirë e vet lojtarit ishte fanella kuqezi. Në Milan, Ronaldinho do të bashkohet me dy bashkëvendësit e tij, Leite Kaka dhe Alexandre Pato.

Kaka: Ronaldinjo sjell cilësi

Futbollisti më i mirë në botë për vitin e kaluar, braziliani Kaka, është njëri nga më të lumturit në Milanello për realizimin e transferimit të Ronaldinjos në klubin kuqezi. Kaka, i cili ndodhet në Brazil, duke u shëruar nga lëndimi i gjurit të majtë është shprehur i lumtur për ardhjen e Ronaldinjos në Milano.
"Jam shumë i lumtur që Ronaldinjo është lojtari ynë i ri. Me ardhjen e tij në Milan ai do të ngrisë cilësinë në skuadër, e cila tashmë sërish është e gatshme për t'u përfshirë në garën për titull", ka theksuar Kaka.

Ferguson bind Cristiano Ronaldon të qëndrojë?
Menaxheri i kampionit të Anglisë dhe Evropës, Manchester United, Alex Ferguson, është takuar me futbollistin e tij Cristiano Ronaldo, me qëllim që ta bindë atë që qëndrojë në klub dhe të mos kalojë në radhët e Real Madridit, bëjnë të ditur mediat portugeze.
Thuhet se Ferguson megjithatë “nuk e ka mbyllur derën” që Ronaldo të luajë për klubin mbretëror spanjoll në pjesën e dytë të këtij sezoni.

Kanali televiziv i Lisbonës thotë se Ronaldo planifikon që, ‘në të ardhmen’, si edhe David Beckham, ta vazhdojë karrierën në Los Angeles Galaxy, në SHBA, dhe se tashmë ka nënshkruar një marrëveshje sponsorimi me një kompani nga ai qytet.

Kompletohet transferimi i Giuly në PSG
Paris Saint-Germain ka kompletuar transferimin e mesfushorit të Romës, Ludovic Giuly, për një shumë të pazbuluar.
Francezi, ka nënshkruar kontratë tre vjeçare me klubin francez, ndërsa pritet të paguhet 3 milionë euro për këtë periudhë. Mediat franceze më herët, përcollën lajmin se PSG sot do të prezantonte Ludovic Giulyn si përforcim të ri, dhe kjo ndodhi.



Agjenti i Guily mbrëmë deklaroi se lojtari nuk është i lumtur në Romë dhe se planifikon të largohet nga Italia, ndërsa këtë pakënaqësi të francezit arriti ta shfrytëzojë PSG.


Guily erdhi në Romë pas disa sezoneve të shkëlqyeshme në Barcelona, me të cilën fitoi edhe Ligën e Kampionëve. PSG është edhe në kërkim të Claude Makele nga Chelsea. PSG transferuan edhe mbrojtësin Lilian Thuram nga Barcelona, por ai nuk arriti ti kalojë me sukses testet mjekësore.

Seedorf mund të kalojë në Juventus?
Sipas sportives Tuttosport, Clarence Seedorf mund të largohet nga Milani pas arritjes së mesfushorit brazilian Ronaldinho, dhe të bëjë një transferim befasues tek Juventus.
Ronaldinho përfundimisht u transferua në Milan, por një lojtar, i cili vazhdimisht ka qenë kritik ndaj këtij transferimi, Clarence Seedorf, mund të largohet nga kuqezinjtë.

Megjithëse mediat italiane dje thanë se Seedorf ishte pajtuar me arritjen e brazilianit, Tuttosport sot shkruan se në fakt nuk është ashtu, dhe ish-lojtari i Ajaxit dhe Real Madridit, seriozisht është duke menduar për largim nga klubi.

Sportivja italiane madje ka shkuar aq larg sa që ka përmendur një kalim të holandezit tek rivali i Milanit, Juventusi. Juve do të presë që Seedorf të bëjë hapin e parë, para se ata të dërgojnë ofertë zyrtare.

Milani, ndërkaq, mund të lejojë largimin e 32-vjeçarit, pasi që beson se ai mund të shkaktojë probleme në dhomën e zhveshjes.

Keane bën ofertë për katër lojtarë të Tottenhamit
Menaxheri i Sunderlandit, Roy Keane, ka dërguar ofertë të vlefshme 23 milionë funte (29 milionë euro), për shërbimet e katër lojtarëve të Tottenhamit.
Pascal Chimbonda, Steed Malbranque, Younes Kaboul dhe Teemu Tainio, janë katërshja e përzgjedhur nga Keane.

Klubi i tyre ka pranuar ofertën e Sunderlandit, ndërsa tash mbetet që lojtarët t’i përcaktojnë kushtet e personale me menaxherin Roy Keane.

Megjithatë, problem për realizimin e një transferimi të tillë mund të paraqesë interesimi i Evertonit për Chimbondan, si dhe interesimi i Newcastlet për Malbranque.

Inter rrit ofertën për Lampardin
Kampioni italian, Interi, është i gatshëm të bëjë ofertë të re prej 14 milionë eurosh për shërbimet e mesfushorit anglez të Chelseat, Frank Lampard.
The Sun shkruan se Chelsea do ta marrë ofertë të re për mesfushorin anglez pas takimit me presidentin e Interit, Massimo Moratti, ndërsa drejtorët i kanë rekomanduar italianit të rrisë shifrën e ofertës.

Jose Mourinho është i vendosur ta marrë Lampardin në Itali ndërsa Moratti është zotuar ta realizojë këtë transferim. Chelsea gjatë vikendit do të nisen për në turne në Lindjen e Largët, ndërsa ekipit pritet t’i bashkohet edhe Lampard.

“Lampardi është prioritet, por normalisht në rastet si ky, kam shikuar rreth e rrotull për një kohë. Nëse nuk është e mundur të nënshkruajmë me Lampard, do të marrim një lojtar me karakteristika të ngjashme”, ka thënë Moratti.

Ferguson i bindur se do ta transferojë Berbatovin
Trajneri i Manchester United thotë se është i bindur që ekipi i tij do ta transferojë sulmuesin bullgar, Dimitar Berbatov, deri në fillim të sezonit.
“Ne i kemi bërë Tottenhamit ofertë për Berbatovin dhe presim rezultate të mira, që kjo marrëveshje të ecë më tej. Berbatov ka qenë mbresëlënës një kohë të gjatë dhe do ishte një shtesë e shkëlqyer për sulmin tonë”, ka thënë Fergi.

United thuhet se ka dërguar ofertë prej 28 milionë eurosh, por Tottenhami është duke kërkuar më shumë. Interesim për të ka shfaqur edhe Barcelona, por trajneri i djajve të kuq është i sigurt se do të arrijë ta transferojë sulmuesin në radhët e veta.

Ferguson ka thënë edhe se marrëveshja me Barbatov, nuk do të thotë që Cristiano Ronaldo do të kalojë në Real Madrid. “Ne po përballemi me situatën në mënyrën më të mirë të mundshme”, ka thënë Ferguson.

Barcelona kthehet kah Berbatov
Sulmuesi bullgar i Tottenhamit, Dimitar Berbatov, është caku i ri i Barcelonës, ka shkruar sot sportivja spanjolle Marca.
21 milionë eurot, të cilat Barcelona i ka fituar nga kalimi i Ronaldinhos në Milan, do t’u mundësojnë katalunasve të sigurojnë një sulmues të klasit botërorë.

Deri tash, drejtuesit e Barcelonës ishin të kthyer kah sulmuesi i Arsenalit, Emmanuel Adebayor, por bisedimet së fundi kanë ndaluar.

Për shërbimet e Berbatov, Barcelona do të duhet të përballet me Manchester United, si dhe me çmimin e lartë që e kërkon Tottenhami. Bullgari pëlqen të luajë në Old Trafford dhe kjo është e vetmja gjë që mund ta ndalojë transferimin e tij tek Barcelona.

Shtypi spanjoll sot shkroi edhe se Barcelona mund rikthehet kah sulmuesi brazilian i Real Madridit, Robinho.

Eto’o udhëton në Uzbekistan
Sot, në mëngjesin e hershëm, sulmuesi i Barcelonës, Samuel Eto’o,ka arritur në kryeqytetin uzbek, Tashkent, ku është pritur nga zyrtarët e klubit Kuruvchi, ndërsa ekziston mundësia që kamerunasi të nënshkruajë edhe kontratë me klubin.
Eto’o, siç shkruan sajti zyrtar i klubit ka arritur në Uzbekistan, ka arritur së bashku me tre përfaqësues të Barcelonës, ndërsa në aeroport ai është pritur nga turmë e madhe e adhuruesve.

Eto’o do të vizitojë Federatën Uzbeke të Futbollit dhe do të takohet me drejtuesit e saj, ndërsa pritet që sulmuesi të takohet edhe me drejtuesit e klubit Kuruvchi për të diskutuar rreth mundësisë që ai të bashkohet me këtë klub.

Në ndërkohë, sportivja spanjolle Sport ka shkruar se klubi aziatik është i gatshëm ta paguajë sulmuesin kamerunas 40 milionë euro, por nuk theksohet periudha për të cilën ai do të paguhet, megjithëse theksohet se kjo do të jetë pagesa më e lartë që është bërë ndonjëherë për ndonjë futbollist.

Eto’o: Do të mendoj seriozisht për ofertën

“U takova me përfaqësues të Kurshuvchit, dhe mund të them se gjetëm gjuhë të përbashkët. Sigurisht se do të mendoj dhe së bashku me agjentët e mi, do t’i kushtojmë një vëmendje serioze propozimit”, ka thënë Eto’o në konferencën e shypit.

Hamilton në pol-pozicion në German GP
Britaniku Lewis Hamilton e ka dërguar McLarenin në pol-pozicion për garën e radhës në Formula 1, atë të Çmimit të Madh të Gjermanisë.
23-vjeçari do ta ndajë rendin e parë së bashku me ngasësin e Ferrarit, Felipe Massa, i cili arriti kohën e dytë më të shpejtë në kualifikimet e sotme.

Ngasësi tjetër i McLarenit, Heikki Kovalainen, do të fillojë nga pozita e tretë, derisa italiani Jarno Trulli, do të jetë në pozitën e katërt me Toyotan e tij.

Raikkonen, i cili ka filluar nga pozita e parë e Hockenheim-it për McLarenin në vitet 2005 dhe 2006, këtë vit do të niset nga pozita e katërt me Ferrarin.

Kjo është hera e tretë që Hamilton do të niset nga pozita e parë gjatë këtij sezoni, ndërsa e nënta në 27 paraqitje të tij në Formula 1.

Hamilton, Massa dhe Raikkonen, në listën e ngasësve, që të tre kryesojnë me pikë të barabarta, nga 48 secili.

Gerrard lëndohet gjatë stërvitjeve
Kapiteni i të kuqve, Steven Gerrard është kthyer në Liverpool nga përgatitjet që ekipi i zhvillon në Zvicër, për shkak të një lëndimi të pësuar.
Gerrard e huqi ndeshjen e mbrëmshme kundër Visla Kracow, si edhe ndeshjen tjetër të radhës kundër Hertës në Gjermani.

“Steven ka pësuar një lëndim dhe për këtë arsye do të jetë jashtë fushave nga shtatë deri në dhjetë ditë. Ai e ka lëshuar kampin dhe është kthyer në Angli, ku është duke u rikuperuar nga lëndimi”, ka thënë zëdhënësi i klubit.

Fabiano nënshkruan marrëveshje të re
Sulmuesi brazilian, Luis Fabiano, ka nënshkruar marrëveshje të re trevjeçare me klubin spanjoll Sevilla.
Fabiano pati një sezon të shkëlqyeshëm nën fanellën e Sevillas dhe arriti madje 24 gola dhe përfundoi në vendin e dytë të golashënuesve në Spanjë, menjëherë pas Guizas.

Paraqitjet e mira të Fabianos, kanë tërhequr vëmendjen e disa ekipeve, në mes të cilave edhe Real Madrid dhe Manchester United.

Megjithatë, ai vendosi për vazhdim të kontratës deri në vitin 2011, sipas së cilës do të përfitojë një rritje të pagës dhe do t’u afrohet futbollistëve më të paguar të Sevillas. 27-vjeçari, para disa ditësh fitoi edhe nënshtetësinë spanjolle.

Juventusi më afër Aquilanit se sa Interi
Siç ka shkruar Tuttosport, Juventusi është i gatshëm të mposhtë Interin për të nënshkruar me italianin Alberto Aquilani, i cili duket se do të largohet nga Roma pas dështimit të bisedimeve rreth kontratës.
I riu italian është duke kërkuar 2.5 milionë euro për sezon, ndërsa më shumë që mund të ofrojë Roma është 1.6 milionë. Aquilani ka tërhequr interesimin e shumë klubeve evropiane, të cilët kanë premtuar plotësim të kërkesave të tij.

Tuttosport ka shkruar se Juventusi dhe Interi tashmë janë në luftë të ashpër për 24 vjeçarin. Bardhezinjtë kanë thënë se nuk do të nënshkruajnë me lojtarë të tjerë, pas arritjes së Christian Poulsen, por përgatiten ta thyejnë këtë vendim për Aquilanin.

Interi në ndërkohë është duke kërkuar një mesfushor të klasit dhe është duke analizuar edhe alternativa tjera, pas vështirësive për të nënshkruar me Frank Lampard.

Por Juventusi është në përparësi, falë edhe miqësisë së mirë të Aquilanit me një varg lojtarët të Zonjës së Vjetër.

Edhe Iniesta, Xavi dhe Puyol në Uzbekistan?
Mediat spanjolle kanë përcjellë lajmin e se edhe tre lojtarë të Barcelonës do të udhëtojnë në Uzbekistan dhe do të jenë mysafirë të ekipit Kuruvchi.
Sportivja spanjolle Sport, ka shkruar se Andreas Iniesta dhe Carles Puyl, janë dy emrat e ri të Barcelonës të cilët gjatë disa ditëve të ardhshme do të udhëtojnë në Tashkent, kryeqytetin e Uzbekistanit.

Klubi i këtij qyteti, Kuruvchi, ka nënshkruar një partneritet me klubin katalunas dhe Barcelona është pajtuar që t’i dërgojë Iniestën dhe Puyol si ambasadorë të vet.

Pritet që ata të përfshihen në disa ceremoni, të lidhura me ndihmën në përmirësimin e zhvillimit të futbollit në këtë vend. Dyshes thuhet se do t’i bashkëngjitet edhe Xavi, i cili u zgjodh Lotjari më i Mirë në Euro 2008.